නිමල් රාජපක්ෂ-

.

යල කන්නයේ වගා හානි සිදුවු ගොවීන්ට මේ වනවිට රුපියල් කෝටි 56ක් ගෙවා අවසන් කළ බව කෘෂිකර්ම අමාත්‍ය මහින්ද අමරවීර මහතා පවසයි.

2023 යල කන්නයේ නියඟයෙන් සිදු වූ වගා හානි සඳහා වන්දි ලබා දීමට රුපියල් කෝටි 100ක් රජයට වැය වනු ඇත.

මෙරටට බලපෑ දැඩි නියඟයෙන් වී වගාවට සිදුවූ හානිය නිසා වලව කළාපය, කුරුණෑගල හා දකුණු පළාත ඇතුළු ප්‍රදේශ ගණනාවක අක්කර 65,000ක් හානියට පත්විය.

මෙම වගා හානි සඳහා වන්දි ගෙවීම වගා හානි සිදු වී මාස දෙකක් තුළ ‌ ලබා දීම අරඹන්නැයි කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා කෘෂිකාර්මික හා ගොවිජන රක්ෂණ මණ්ඩලයට උපදෙස් දුන්නේය.

ඒ අනුව කුරුණෑගල දිස්ත්‍රික්කයේ නියඟයෙන් වගා හානි සිදු වූ ගොවීන්ට වගා හානි වන්දි ලබා දීම ඊයේ (19) වාරියපොල නාගරික ප්‍රජා ශාලාවේ දී සිදු විය. කෘෂිකර්ම හා වැවිලි කර්මාන්ත අමාත්‍ය මහින්ද අමරවීර, පශු සම්පත් රාජ්‍ය අමාත්‍ය ඩී.බී. හේරත්, ජනමාධ්‍ය රාජ්‍ය අමාත්‍ය ශාන්ත බණ්ඩාර යන මහත්වරු ඇතුළු පිරිසක් මෙම අවස්ථාවට සහභාගි වූහ.
පසුගිය යල කන්නයේ වගා හානි සිදුවූ වී වගා බිම් ප්‍රමාණය අක්කර 65,000කි. සිදුව ඇති හානි තක්සේරු කිරීම් අනුව ගොවීන් 64,000ක් සදහා ගෙවීමට තක්සේරු කර ඇති මුදල රුපියල් මිලියන 1000 කි.මේ වනවිට එම සමස්ත මුදලින් රුපියල් මිලියන 562ක් ගෙවා අවසන් කර ඇති බව කෘෂිකාර්මික හා ගොවිජන රක්ෂණ මණ්ඩලයේ සභාපති ඩබ්. එම්. එම්. බී. වීරසේකර මහතා සඳහන් කරයි.

ඊයේ (19) කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතාගේ ප්‍රධානත්වයෙන් කුරුණෑගල දිස්ත්‍රික්කයේ වගා හානි සිදු වූ ගොවීන් සදහා වන්දි පිරිනැමීම සිදු වූ අතර ඊයේ දිනය තුළ බෙදා දෙන ලද වන්දි මුදල් ප්‍රමාණය රුපියල් මිලියන 25කි.

වගා හානි සිදුවන අක්කරයකට රුපියල් 40,000 බැගින් හෙක්ටයාර් එකකට රුපියල් ලක්ෂයක වන්දි මුදලක් නොමිලයේ ලබා දීම ආරම්භ කළ බව ද අමාත්‍යවරයා කීය.
නමුත් සියලු ගොවීන් කන්නයකට මුදලක් ගෙවා රක්ෂණ දායකත්වය ලබා ගන්නේ නම් හෙක්ටයාර් එකකට රුපියල් ලක්ෂ දෙකහමාරක වන්දියක් ලබා ගැනීමට හැකියාව ඇති බව ද සදහන් කළේය. ඒ සඳහා ගොවි මහතෙකුට අක්කරයක් සඳහා එක් කන්නයකට ගෙවීමට සිදුවන්නේ රුපියල් 6400ක් පමණි.