හෙල්මට්වලින් පහර දී එක්දරු පියෙක් ඝාතනය කර තුන් මසක් ගතව තිබිය දී එවැනිම සාහසික පුවතක් අපට වව්නියාව ප්‍රදේශයෙන් වාර්තා වුණි.
වවුනියාව දිස්ත්‍රික්කයේ ප්‍රසිද්ධ පාසලක අධ්‍යාපනය ලබන දරුවන් පිරිසක් මාර්ගයේ දී තවත් සිසුවෙකුට හෙල්මට් හා පොලු මුගුරුවලින් පහරදෙන අයුරු දැක්වෙන වීඩියෝවක් මේ දිනවල සාමාජ මාධ්‍ය ඔස්සේ සංසරණය වෙමින් පවතී.
පහර කෑමෙන් සිසුවෙකු තුවාල ලබා ඇති අතර, පහරකෑමට ලක්වු සිසුවා සිද්ධිය සම්බන්ධයෙන් වවුනියාව පොලීසිය වෙත පැමිණිල්ලක් ඉදිරිපත් කර ඇතැයි අප වාර්තාකරු පැවසීය.
පොලීසිය පැවසූවේ, සිසුවාට හෙල්මට් හා පොලු මුගුරුවලින් පහරදුන් සිසුන් දෙදෙනෙක් මේ වනවිට අත්අඩංගුවට ගෙන ඇති බවය.
සිසුන් අතර ඇති වූ පෞද්ගලික ආරවුලක් පහරදීමට හේතුවී ඇති අතර, සිසුවාට පහරදෙන අයුරු දැක්වෙන වීඩියෝවක් සමාජ මාධ්‍ය තුළ සංසරණය වන බැවින් ඒ ඔස්සේ පරීක්ෂණ පවත්වා පහරදීමට සම්බන්ධ අනෙක් දරුවන් අත්අඩංගුවට ගැනීමට නියමිත බවද පොලීසිය කියා සිටියේය.
පසුගිය පෙබරවාරි මස 14 වනදා වැලිපැන්න, ගල්මත්ත ප්‍රදේශයේ පටු මාර්ගයක අධික වේගයෙන් යතුරුපැදි ධාවනය කළ පාසැල් වියේ පසුවන ළමුන් තිදෙනකුට එය නවත්වන්නැයි අවවාද කළ 34 හැවිරිදි පුද්ගලයෙකුට යතුරුපැදි හෙල්මට්වලින් පහරදී ඝාතනය කෙරුණි.
සිද්ධියෙන් අවාසනාවන්ත ලෙස මියගියේ රංග විරාජ් නම් එක්දරු පියෙකි.
රංගට දිවි අහිමි කළ බාලවයස්කාර ළමුන් තිදෙනා මතුගම මහෙස්ත්‍රාත් අධිකරණයේ නියෝගයකට අනුව මාකොළ ළමා රැඳවුම් මධ්‍යස්ථානයට යොමුකෙරුණි.
රංගගේ තුන් මාසේ දානය මැයි 14 වනදාට යෙදී තිබුණු අතර එහි අමිහිරි මතකයන් මැකී යන්නට මත්තෙන් මෙවැනි තවත් පුවතක් ඇසීමට ලැබීම කෙතරම් අවාසනාවන්ත තත්ත්වයක් ද ?