අන්තර් විශ්වවිද්‍යාල ශිෂ්‍යබල මණ්ඩලයේ කැඳවුම්කරු වසන්ත මුදලිගේ යළි රක්ෂිත බන්ධනාගාරගත කිරීමට කොළඹ කොටුව මහෙස්ත්‍රාත්වරයා අද (05) නියෝග කළේය.
සැකකරුව අද අධිකරණය හමුවට කැඳවා තිබූ අතර එහිදී මහෙස්ත්‍රාත්වරයා නියෝග කළේ සැකකරුව ලබන 13 වනදා තෙක් යළිත් රිමාන්ඩ් භාරයට පත්කිරීමටය.
උද්ඝෝෂණයකදී පොලිස් නිලධාරීන්ගේ රාජකාරියට බාධා කිරීම සහ අයුතු අවහිර සිදුකිරීම ඇතුළු චෝදනා කිහිපයක් වසන්ත මුදලිගේට එල්ලවී තිබේ.
ගාලුමුවදොර අරගල ක්‍රියාකාරිකයකු වන රන්දිමාල් ගමගේව ඇප මත මුදාහරින ලෙස කොළඹ මහෙස්ත්‍රාත් අධිකරණය නියම කළේය.
අරගලය පැවති සමයේ ශ්‍රී ලංකා රූපවාහිනී සංස්ථාවට අයුතු ලෙස ඇතුළුවී එහි දේපළවලට අලාභහානි සිදු කිරීමේ සිද්ධිය සම්බන්ධයෙන් ඔහුව අත්අඩංගුවට ගෙන මෙලෙස අධිකරණයට ඉදිරිපත් කර තිබුණි.
ඩුබායි හි සිට මෙරටට පැමිණෙන අවස්ථාවේදී මෙම සැකකරු කටුනායක ගුවන් තොටුපොළේදී පොලීසිය විසින් අද (05) අත්අඩංගුවට ගත්තේය.
පසුව කුරුඳුවත්ත පොලීසිය විසින් මෙම සැකකරුව කොළඹ ප්‍රධාන මහෙස්ත්‍රාත් ප්‍රසන්න ද අල්විස් මහතා හමුවට ඉදිරිපත් කළේය.
එහිදී පොලීසිය හා විත්ති පාර්ශ්ව නීතිඥවරුන් ඉදිරිපත් කළ කරුණු සලකාබැලූ ප්‍රධාන මහෙස්ත්‍රාත්වරයා සැකකරු රුපියල් ලක්ෂ දෙක බැගින් වූ ශරීර ඇප දෙකක් මත මුදාහරින ලෙස නියම කළේය.
පැමිණිල්ල නැවත ලබන 09 වනදා කැඳවන ලෙසද නියෝග කෙරුණි.