ලොව සමහර රටවල් සුභවාදීව වෙනස් වෙලා තිබුණත් අවාසනාවකට වගේ අපේ රට දීර්ඝ කාලයක් තිස්සේ ආර්ථික වශයෙන් ආපස්සට ගොස් ලංකාව බංකොලොත්වී චාරිත්‍ර වාරිත්‍ර සංස්කෘතික අංග පිරිහීමකට ලක්ව ඇතැයි බෙල්ලන්විල රාජ මහා විහාරාධිපති සිංගප්පූරුවේ ප්‍රධාන සංඝ නායක ආචාර්ය ඛෙල්ලන්විල ධම්මරතන හිමියෝ පැවසූහ.
බෙල්ලන්විල ඇසළ පෙරහර සාර්ථක කිරීමට සහාය වූ ආයතන හා පුද්ගලයන්ට තුති පුදකිරීම සඳහා විහාරස්ථානයේ පැවති රැස්වීමේදී උන්වහන්සේ මේ බව ප්‍රකාශ කළහ.
‘ගියවර පෙරහරට ලැබුණු ආධාර වලට වඩා දෙගුණයක් ඒ සඳහා වැය වුවත් පෙරහර සාර්ථකව කිරීමට හැකිවූයේ මෙම පිරිස හා ආයතනවල කැපවීම නිසයි.
මට මතකයි එක් වරක් බෙල්ලන්විල ඇසළ පෙරහරේ අලි ඇතුන් 111 ක් ගමන් කළා. අද කාලෙ එහෙම අලි ඇතුන් සොයා ගැනීම ඉතා අපහසුයි. සොයා ගත්තත් ඒ සඳහා යන වියදම හිතා ගන්නත් බෑ.
ගියවර පෙරහර කිරීමේදී මුහුණදුන් අපහසුතා වලට වඩා වැඩි දුෂ්කරතා වලට ඉදිරියේදී මුහුණ පාන්න සිදුවේවි කියා මා සිතනවා.
ඒ කවර හේතුවක් නිසාවත් වසර 2300 ක සංස්කෘතික වටිනාකමින් යුත් පෙරහැර නතර කරන්න පුලුවන් කමක් නෑ. ඒ නිසා එම දුෂ්කරතා තේරුම් ගෙන ලබනවර පෙරහර කරන්න අධිෂ්ඨාන ඇති කරගන්න” යැයි විහාරාධිපති හිමියෝ පැවසූහ.