ගතවු පැය 24ක කාලය තුළ සිදුකළ විශේෂ රථවාහන මෙහෙයුමේදී අත්අඩංගුවට ගන්නා ලද බීමත් රියදුරන් සංඛ්‍යාව 529ක් බව පොලීසිය පවසයි. 

එය, විශේෂ රථවාහන මෙහෙයුම ආරම්භ කිරීමෙන් පසු පැය 24ක් තුළ අත්අඩංගුවට ගත් වැඩිම සංඛ්‍යාව බව ද පොලීසිය පවසයි.

එමෙන්ම එම කාලය තුළදී රථවාහන වැරදි සිදුකළ බවට හඳුනාගෙන නීතිය ක්‍රියාත්මක කළ සමස්ත රියදුරන් සංඛ්‍යාව 7,264 ක් බව පොලිස් මාධ්‍ය අංශය පවසයි.

එහිදී, බීමත් රියදුරන් 529ක්, අපරීක්ෂාකාරී හා අන්තරාදායක ලෙස රිය පැදවූ රියදුරන් 57ක්, අධික වේගයෙන් රිය පැදවූ රියදුරන් 54ක්, මාර්ග නීති උල්ලංඝණය කළ රියදුරන් 1,057 ක්, බලපත්‍ර වැරදි සම්බන්ධ රියදුරන් 614ක් සහ වෙනත් රථවාහන වැරදි සම්බන්ධයෙන් රියදුරන් 4,953 ක් වශයෙන් නීතිය ක්‍රියාත්මක කර තිබේ..

ඒ අනුව, මෙම විශේෂ රථවාහන මෙහෙයුම තවදුරටත් ක්‍රියාත්මක කිරීමට කටයුතු කරනු ලබන අතර බීමත්ව රිය ධාවනය නොකිරීමටත්, මාර්ග නීති උල්ලංඝණය ඇතුළු අනෙකුත් රථවාහන නීතී රීති උල්ලංඝණය නොකරන ලෙසටත් ශ්‍රී ලංකා පොලීසිය මහජනතාවගෙන් ඉල්ලා සිටී.