ගිනිකොන දිග බෙංගාල බොක්ක ආශ්‍රිතව පවතින පීඩන අවපාතය බටහිර දෙසට ගමන් කරමින් පවතින බව කාලගුණවිද්‍යා දෙපාර්තමේන්තුව පවසයි.

පීඩන අවපාතය පිළිබඳව රතු නිවේදනයක් නිකුත් කරමින් කාලගුණවිද්‍යා දෙපාර්තමේන්තුව ඒ බව සඳහන් කරයි.

එම නිවේදනය අද (31) රාත්‍රී 9.30 සිට හෙට (01) පෙරවරු 9.30 තෙක් වලංගු වන බවද එම දෙපාර්තමේන්තුව පවසයි.

ඒ අනුව අද සවස 5.30 වනවිට ත්‍රිකුණාමලයට කිලෝමීටර් 250ක් පමණ නැගෙනහිර දෙසට වන්නට අක්ෂාංශ 8.6°N සහ දේශාංශ 83.5°E ආසන්නයේ පීඩන අවපාතය කේන්ද්‍රගතව පැවතුනි.

එම පද්ධතිය දකුණට බරව නිරත දෙසට හැරී ගමන්කර හෙට (01) පෙරවරුවේදී ශ්‍රී ලංකාවට නැගෙනහිර වෙරළ තීරය හරහා උතුරු අක්ෂාංශ 7° ත් 8° අතර ගමන් කිරීමට ඉඩ ඇති බව කාලගුණවිද්‍යා දෙපාර්තමේන්තු පෙන්වා දෙයි.

මේ අතර නැගෙනහිර, ඌව සහ මධ්‍යම පළාත්වලත් පොළොන්නරුව දිස්ත්‍රික්කයේත් ඇතැම් ස්ථානවලට මි.මී. 150ක පමණ ඉතා තද වැසි ඇතිවිය හැකි බව කාලගුණවිද්‍යා දෙපාර්තමේන්තුව නිවේදනය කරයි. 

එමෙන්ම දිවයිනේ සෙසු ප්‍රදේශවල ඇතැම් ස්ථානවලට මි.මි. 100 ට වැඩි තද වැසි ඇතිවිය හැකිය.