එළඹෙන පළාත් පාලන මැතිවරණය සඳහා වූ එක්සත් ජනරජ පෙරමුණේ මඩකලපුව දිස්ත්‍රික් ප්‍රචාරක කටයුතු නිල වශයෙන් මඩකලපුවේ දී ආරම්භ කෙරිණි.
එම අවස්ථාවේ පැවති මාධ්‍ය හමුවකදී එක්සත් ජනරජ පෙරමුණේ නායක පාඨලී චම්පික රණවක මහතා ඉන්දු-ලංකා ගිවිසුම් සම්බන්ධයෙන් දැඩි විවේචනයක් එල්ල කළේය.
රණවක මහතා ප්‍රකාශ කළේ මඩකලපුව නගරයේ සංවර්ධනයට, විදුලි පද්ධතිය ප්‍රතිසංස්කරණයට සහ දිස්ත්‍රික්කයට සියයට සියයක් විදුලිය ලබාදීමට පසුගිය කාලය තුළ තම අමාත්‍යාංශ මගින් විශාල වැඩ කොටසක් සිදු කළ බවයි. විවිධ සන්ධාන හා ආණ්ඩු යටතේ තමන් කටයුතු කළද, මෙවර තමන්ගේ ම වූ දේශපාලන ව්‍යාපාරය වන එක්සත් ජනරජ පෙරමුණ පැන්සල් ලකුණින් තරඟ කරන බවත්, ඒ සඳහා වන ප්‍රචාරක කටයුතු මඩකලපුවෙන් ආරම්භ කරන බවත් ඔහු පැවසීය.
මෙහිදී විශේෂ අවධානය යොමු කළ කරුණක් ලෙස ඉන්දීය අගමැති නරේන්ද්‍ර මෝදි මහතාගේ මෑත ශ්‍රී ලංකා සංචාරය රණවක මහතාගේ ඇගයීමට ලක් විය. කෙසේ වෙතත්, ජනාධිපති අනුර දිසානායක මහතා සහ ලංකා ආණ්ඩුව ඉන්දියාව සමඟ අත්සන් කළ ගිවිසුම් හත සම්බන්ධයෙන් ඔහු බරපතළ ප්‍රශ්න කිහිපයක් මතු කළේය.
එම ගිවිසුම්වලට පදනම දැමුවේ 2023 වසරේදී එවකට ජනාධිපති රනිල් වික්‍රමසිංහ මහතා ඉන්දියාවට ගොස් අනාගත සහයෝගීතාව පිළිබඳ එකඟතා ලියවිල්ලක් ප්‍රකාශයට පත් කිරීම තුළින් බව රණවක මහතා පෙන්වා දුන්නේය. බලශක්ති හුවමාරුව, ආරක්ෂක සම්බන්ධීකරණය, ඩිජිටල්කරණය සහ ආර්ථික සහයෝගීතාවය වැනි කරුණු එහි අන්තර්ගත වූ බව ඔහු සඳහන් කළේය. එවකට විපක්ෂයේ සිටි වත්මන් ජනාධිපති අනුර දිසානායක මහතා එම ගිවිසුම්වලට එරෙහිව මැතිවරණ ව්‍යාපාරය මෙහෙයවූ බවත්, ඔහුට ලැබුණු ජනවරම එවැනි ගිවිසුම්වලට එරෙහි වීම සඳහා වූවක් බවත් රණවක මහතා අවධාරණය කළේය.
එහෙත්, ජනාධිපති ධූරයට පත්වීමෙන් පසු අනුර දිසානායක මහතා එම ගිවිසුම්වලට එළඹීම ප්‍රජාතන්ත්‍රවාදයේ මූලධර්මවලට පටහැනි ඒකාධිපති ක්‍රියාවලියක් ලෙස රණවක මහතා දැඩි ලෙස විවේචනය කළේය. ශ්‍රී ලංකා රාජ්‍යයේ ස්වෛරීභාවය ජනාධිපති බලයට යටත් කරමින් මෙම ගිවිසුම් ඉදිරිපත් කර ඇති බව ඔහු චෝදනා කළේය.